ဒိုင်နှိပ်စက်သမျှ တောင့်ခံပြီးမှ မန်စီးတီးကို ပင်နယ်တီမှာ အနိုင်ယူတဲ့ အာဆင်နယ်

အာဆင်နယ်အသင်းအနေနဲ့ ဒီနေ့မှာ ဂိုးသမား ရမ်းစ်ဒေးလ်၊ ခံစစ်မှာ ဘန်ဝှိုက်၊ ဆာလီဘာ၊ ဂါဘရီယယ်လ်နဲ့ တင်းမ်ဘားတို့ကို အသုံးပြုခဲ့ပြီး ကွင်းလယ်မှာတော့ ပါတေး၊ ဒက်ကလန် ရိုက်စ်နဲ့ အော်ဒီဂွါဒ်တို့ကို ခင်းကျင်းလာခဲ့သလို တိုက်စစ်မှာတော့ ဆာကာ၊ မာတီနယ်လီနဲ့ ဟာဗတ်ဇ်တို့ကို ပွဲထုတ်ခဲ့တာဖြစ်ပါတယ်။

မန်ချက်စတာစီးတီးတို့ကတော့ ဂိုးသမား အော်တေဂါ၊ ခံစစ်မှာ ရူဘင် ဒီယက်စ်၊ စတုန်းစ်၊ ဝေါ်လ်ကာနဲ့ အာကန်ဂျီတို့ကို အထိုင်ချခဲ့ပြီး ကွင်းလယ်မှာတော့ ရိုဒရီ၊ ကိုဗာချစ်ချ်၊ ဘာနာဒို ဆေးလ်ဗားနဲ့ ဂရီးလစ်ရှ်တို့ကို တွဲဖက်ပေးခဲ့သလို တိုက်စစ်မှာတော့ အယ်လ်ဗာရက်ဇ်နဲ့ ဟားလန်းတို့ကို တင်ကစားလာခဲ့တာပါ။

ပွဲစကတည်းက မန်စီးတီးတို့ ဘောလုံးကိုင်ကစားခဲ့ပြီး အာဆင်နယ်တို့ကတော့ ဒက်ကလန် ရိုက်စ်ကို ရှေ့တက်ကစားခိုင်းတဲ့ ပုံစံကို သုံးခဲ့ချိန်မှာ ဟာဗတ်ဇ်ရဲ့ Pressing တွေက လိုအပ်ချက်တွေ များနေခဲ့တာကြောင့် မန်စီးတီးတို့ဘက်က ဂိုးသမား အော်တေဂါက ဂိုးတက်သွင်းမယ်ဆိုရင်တောင် အနှောင့်အယှက် မရှိမယ့် ပုံစံမျိုး ဖြစ်နေခဲ့ပါတယ်။

ဒိုင်လူကြီး စတူးဝပ် အက်ထ်ဝဲလ်ရဲ့ စုတ်ပြတ်သတ်နေတဲ့ ကိုင်တွယ်ပုံက ဘာမှန်းမသိတဲ့ အဝါကတ်တွေကို မြင်ခဲ့ရစေသလို မန်စီးတီးဘက်က ရိုဒရီကတော့ လုပ်ချင်တာလုပ် နဘယံ ဘေးမရှိဖြစ်နေပြီး လူချခွင့်လိုင်စင်ရထားသလား ထင်ရအောင် ဖြစ်နေခဲ့ချိန်မှာ နည်းပြ အာတီတာ ပေါက်ကွဲခဲ့ပြီး အဝါကတ်ပါ ထိခဲ့သေးတာပါ။

ပထမပိုင်းမှာ ဟာဗတ်ဇ်ရဲ့ အခွင့်အရေးနှစ်ကြိမ်ကို ဂိုးသမားတည့်တည့်ချည်း ကန်မိခဲ့လို့ ဂိုးမရှိသရေဖြစ်နေခဲ့ကြပြီး ဒုတိယပိုင်းမှာတော့ မန်စီးတီးတို့ ဖိကစားခဲ့ပေမယ့် အားအနည်းဆုံး Weak Link ဖြစ်နေတဲ့ ကိုဗာချစ်ချ်က ဂွန်ဒိုးဝမ်ရဲ့ နေရာကို အစားမဝင်နိုင်သေးသလို ဘာနာဒို ဆေးလ်ဗားကလည်း တင်းမ်ဘားရဲ့ အိတ်ထဲက မထွက်နိုင်ခဲ့တာကြောင့် ဗျူဟာပြိုင်ပွဲက အတော်လေး ကြည့်ကောင်းခဲ့တာဖြစ်ပါတယ်။

ဒုတိယပိုင်းမှာ မန်စီးတီးတို့ ပိုမိုထိုးဖောက်နိုင်ခဲ့ပေမယ့် ဂိုးသမား ရမ်းစ်ဒေးလ်ရဲ့ နေရာယူမှန်မှန်နဲ့ ကာကွယ်မှုတွေကြောင့် ဂိုးရဖို့ ခက်နေခဲ့သလို မန်စီးတီးတို့ဘက်က ဂရီးလစ်ရှ်၊ ကိုဗာချစ်ချ်နဲ့ ဟားလန်းတို့အစား ဖိုဒန်၊ ဒီဘရိုင်းနားနဲ့ ပါးလ်မားတို့ကို ထည့်ခဲ့ပြီး အာဆင်နယ်တို့ဘက်ကတော့ တင်းမ်ဘားနဲ့ မာတီနယ်လီတို့အစား တီယာနီနဲ့ ထရော့ဆတ်တို့ကို ထည့်သွင်းခဲ့တာပါ။

ပွဲချိန် ၇၇ မိနစ်မှာတော့ မန်စီးတီးတို့ အဖွင့်ဂိုးရသွားခဲ့ပြီး ဒီဂိုးကိုတော့ ပါတေးရဲ့ ပုံမကျ ပန်းမကျ တက်လုတာကနေ Break နိုင်ခဲ့တဲ့ မန်စီးတီးတို့ ညာခြမ်းကနေ ထိုးဖောက်ခဲ့ရာမှာ နေရာယူမှု၊ ဖျက်ထုတ်မှု၊ တည်ငြိမ်မှု သုံးခုစလုံး တစ်ပြိုင်တည်း ညံ့ဖျင်းပြီး တောသားကျလွန်းနေတဲ့ တီယာနီကို ပါးလ်မားက ကျော်ဖြတ်ပြီး အဝေးတိုင်ထောင့်ကို ကန်သွင်းခဲ့ရာမှာ ရမ်းစ်ဒေးလ် မမီဘဲ ဂိုးပေးခဲ့ရတာဖြစ်ပါတယ်။

ဒီနောက်မှာတော့ အာဆင်နယ်တို့ဘက်က ဂါဘရီယယ်လ်၊ ရိုက်စ်နဲ့ ဟာဗတ်ဇ်တို့အစား စမစ်ရိုး၊ ဖာဘီယို ဗီယာရာနဲ့ နကီးတီးယားတို့ကို ထည့်ပြီး တိုက်စစ်မြှင့်ခဲ့ချိန်မှာ မန်စီးတီးတို့ ခံစစ်နဲ့ ကောင်တာသာ ကစားနေခဲ့ပြီး ပွဲချိန် မိနစ် ၉၀ အပြည့်မှာတော့ နာကျင်အချိန်ပို ၈ မိနစ်အထိ ပေးခဲ့သလို ဝေါ်လ်ကာနဲ့ ပါတေးတို့ ခေါင်းချင်းဆောင့်မိလို့ပါ မိနစ်တွေက ထပ်တိုးလာခဲ့တာပါ။

ပွဲချိန် ၁၀၁ မိနစ်မှာတော့ အာဆင်နယ်တို့ ချေပဂိုးရသွားခဲ့ပြီး ညာထောင့်ကန်ဘောကနေ မန်စီးတီးတို့ ရှင်းထုတ်ခဲ့တာကို ပြရခဲ့တဲ့ ဆာကာက အတွင်းကို ပြန်ပေးရာမှာ ထရော့ဆတ်က တစ်ချက်ခေါက်ပြီး ဘယ်ခြေနဲ့ ကန်သွင်းတာက သိပ်မကောင်းခဲ့ပေမယ့် နောက်ခံလူ အာကန်ဂျီကို မှန်ပြီး လမ်းကြောင်းပြောင်းဝင်သွားခဲ့လို့ ဒိုက်ပစ်စောတဲ့ အော်တေဂါ ငုတ်တုတ်မေ့ခဲ့ရသလို တစ်ဂိုးစီသရေနဲ့ ပင်နယ်တီ ကန်ဖို့ ဖြစ်လာခဲ့ပါတယ်။

ပင်နယ်တီ အဆုံးအဖြတ် ကန်သွင်းခဲ့ရာမှာတော့ အာဆင်နယ်ဘက်က ကပ္ပတိန် အော်ဒီဂွါဒ် လှလှပပ ကန်သွင်းနိုင်ခဲ့ပေမယ့် မန်စီးတီးကပ္ပတိန် ဒီဘရိုင်းနား ဘားထိခဲ့အပြီး ဒုတိယအကြိမ်မှာတော့ အာဆင်နယ်ဘက်က ထရော့ဆတ်က တည်တည်ငြိမ်ငြိမ်ပဲ ဂိုးအဖြစ် ပြောင်းလဲနိုင်ခဲ့သလို မန်စီးတီးရဲ့ ဘာနာဒို ဆေးလ်ဗားက ဂိုးစယူပေးနိုင်ခဲ့လို့ နှစ်ဂိုး-တစ်ဂိုးဖြစ်နေခဲ့တာပါ။

တတိယအလုံးကိုတော့ ရာသီကြိုမှာ လွဲထားဖူးလို့ ပရိသတ်တွေ စိုးရိမ်နေတဲ့ ဆာကာက အမှားအယွင်းမရှိ ကန်သွင်းနိုင်ခဲ့ပြီး မန်စီးတီးဘက်က ရိုဒရီ ကန်သွင်းရာမှာတော့ ဂိုးသမား ရမ်းစ်ဒေးလ်က မှန်မှန်ကန်ကန် ခန့်မှန်းပြီး ကာကွယ်သွားခဲ့အပြီးမှာ စတုတ္ထ ပင်နယ်တီကိုတော့ ဖာဘီယို ဗီယာရာက ဘယ်ဘက်အပေါ်ထောင့်ထဲကို လှလှပပ ကန်ထည့်သွားနိုင်ခဲ့လို့ လေးလုံးမြောက်မှာ လေးဂိုး-တစ်ဂိုးနဲ့ ပွဲပြီးဆုံးခဲ့တာဖြစ်ပါတယ်။

အာဆင်နယ်တို့အတွက်တော့ ရာသီကြိုမှာ ကွန်မြူနတီဒိုင်းတစ်လုံးနဲ့ အဖွင့်လှနိုင်ခဲ့ကြပြီး သူတို့အတွက် ၁၇ ကြိမ်မြောက် ဒိုင်းကို ရယူနိုင်ခဲ့ကြသလို ဒုတိယ အအောင်မြင်ဆုံးအသင်းဖြစ် လီဗာပူးလ်ကို ချန်ထားနိုင်ခဲ့ကြပြီး မန်စီးတီးတို့ကတော့ နောက်ဆုံး သုံးနှစ်ဆက်တိုက် ရှုံးနိမ့်ခဲ့တဲ့ မှတ်တမ်းဆိုးနဲ့ ကြုံတွေ့သွားခဲ့ရပါကြောင်း ဖော်ပြလိုက်ရပါတယ်။

REF: INTERNET SOURCES
PHOTOS CREDIT TO OWNERS
SPORTS A2Z.

The post ဒိုင်နှိပ်စက်သမျှ တောင့်ခံပြီးမှ မန်စီးတီးကို ပင်နယ်တီမှာ အနိုင်ယူတဲ့ အာဆင်နယ် first appeared on Sports A2Z.

Your new digest 50