Gym ကအပြန် မီးလောင်နေတဲ့ အဆောက်အဦးထဲကလူတွေကို ကယ်တင်ပေးခဲ့တဲ့ လူငယ်လေး

မတ်လ ၂၄ ရက်နေ့က ဗီယက်နမ်နိုင်ငံ, ဟနွိုင်းမြို့က အသက် ၂၀ နှစ်အရွယ်တက္ကသိုလ်ကျောင်းသားလေး ငုယန် လီတုဟာ Gym ကနေ အိမ်ပြန်လာစဉ် မီးလောင်နေတဲ့ အဆောက်အဦးတစ်ခုထဲက လူများစွာကို ကယ်တင်ခဲ့ပါတယ်။ ဖြစ်စဉ်ကတော့ သူဟာ အိမ်ကို ဆိုင်ကယ်စီးပြီးပြန်လာစဉ် Hoang Mai ရပ်ကွက်ရှိ ခြောက်ထပ်အဆောက်အဦးကနေ မီးခိုးမည်းတွေထွက်လာနေတာကို မြင်တွေ့ခဲ့ပါတယ်။

မီးလောင်နေတာဖြစ်ပြီး အဲ့ဒီအဆောက်အဦးထဲမှာ လူ ၇ ဦး ပိတ်မိနေခဲ့ပါတယ်။ ငုယန် လီတုက အခြားလမ်းသွားလမ်းလာတွေနဲ့အတူ အနီးနားက ခေါင်းမိုးပေါ် တက်ခဲ့ပြီး ထွက်လို့ရတဲ့လမ်းကြောင်းတစ်ခုဖန်တီးဖို့ လှိုင်းတွန့်သံခေါင်းမိုးကို ဖောက်ထွင်းခဲ့ပါတယ်။

ငုယန်က လှေကားနဲ့ အသက်ကြီးပိုင်းလူ ၂ ဦးကို အောက်ဆင်းဖို့ ကူညီပေးခဲ့ပြီး မီးခိုးထူထပ်နေတဲ့ အဆောက်အဦးထဲ ဝင်ရောက်ကာ မိသားစုတစ်စု ( အမျိုးသမီး ၂ ဦးနဲ့ ကလေး ၃ ဦး) ကိုကယ်တင်ခဲ့ပါတယ်။ မီးသတ်သမားတွေရောက်လာတဲ့အထိ ကျန်ရှိနေတဲ့မိသားစုတွေကိုလည်း ဘေးကင်းရာကို ပို့ဆောင်ပေးခဲ့ပါတယ်။

သူဟာ အဆောက်အဦးထဲဝင်တဲ့အချိန်တုန်းက မီးခိုးငွေ့ရှုရှိုက်တာကနေကာကွယ်ဖို့သူ့မျက်နှာကို ရေစွတ်ထားတဲ့သူ့ရဲ့ရှပ်အင်္ကျီနဲ့ ဖုံးထားခဲ့တာပါ။ ဒီဖြစ်ရပ်အပြီးမှာ သူနဲ့ အခြားမီးဘေးသင့်သူတွေဟာ မီးခိုးငွေ့ရှုရှိုက်မိတဲ့အတွက် ဆေးရုံတစ်ခုမှာ ကုသမှုခံယူခဲ့ရပါတယ်။

သူ့ရဲ့သူရဲကောင်းဆန်တဲ့လုပ်ရပ်ကြောင့် သူ့ကို Ho Chi Minh Communist Youth Union က “ရဲရင့်တဲ့လူငယ်” ဆုတံဆိပ်နဲ့ ဗီယက်နမ်ရဲ့ပညာရေးဝန်ကြီးဌာနက ချီးကျူးဂုဏ်ပြုလက်မှတ်တွေ ပေးအပ်ခဲ့ပါတယ်။

Ref: A 20-year-old student from Hanoi ran into a burning building to save seven people who were trapped

WL (ရိုးရာလေး)

The post Gym ကအပြန် မီးလောင်နေတဲ့ အဆောက်အဦးထဲကလူတွေကို ကယ်တင်ပေးခဲ့တဲ့ လူငယ်လေး appeared first on YOYARLAY Digital Media and News.

Your new digest 49